Фирмите бараат 8.000 работници, но не можат да најдат кадар
Како резултат на неусогласувањето на студиските програми со пазарот на трудот, имаме 119.000 невработени и 8.000 слободни работни места за кои бизнисите бараат, но не можат да најдат работници. Ова го изјави професорот Изет Зеќири, според кој, неопходно е универзитетите да започнат реформи за пократки студиски програми, со кои ќе одговорат на пазарот на трудот. Од Стопанската комора на северозападна Македонија велат дека ситуацијата е слична низ целиот Западен Балкан. Според оваа комора, во градежништвото и ИТ-секторот има недостиг од работници, додека над 30 отсто од економскиот развој доаѓа од градежниот сектор.
„Промените што се случуваат во дигиталниот свет се алармантни. До 2030 година ќе имаме и други професии покрај овие што ги имаме и не е случајно што најголемите компании основаа свои универзитети кои произведуваат посебни профили и професии. Неопходно е универзитетите да се подготват во оваа насока да одговорат на пазарот на трудот“, рече Изет Зеќири, ректор на Универзитетот Мајка Тереза.
