Специјалниот известувач за Косово во Европскиот парламент, Виола фон Крамон, денеска ги повика властите во Приштина да ги повлечат специјалните полициски единици од северот и да седнат на преговарачка маса, пренесува Танјуг.
Таа рече дека единствениот начин да се реши ситуацијата на северот на Косово, на конструктивен начин, е преку дијалог и додаде дека владата во Приштина презема многу ризици со своите потези.
„Дали ова е обликот на „добро“ владеење што го сакаме? Наместо тоа, треба да имаме повеќе мерки за градење доверба. Дијалогот во Косово е единствениот излез од оваа ситуација. Ги повикуваме косовските власти да размислат за преземање мерки за градење доверба. На пример – повлекување на специјалните полициски сили од северот и седнување на преговарачка маса. Инволвираните страни треба конструктивно да се вклучат во дијалог за решавање на отворените прашања“, порачува Фон Крамон.
