Институциите нема да ја преиспитаат одлуката за Богојески
Ниту една државна институција, изгледа, нема да ја преиспита одлуката за изборот на Петар Богојески за директор на Националната агенција за европски образовни програми и мобилност. Од Владата повторуваат ист одговор како и пред неколку дена – дека не се надлежни и дека управниот одбор што го направил изборот има автономија во донесувањето одлуки.
„Одлуката ја донесе Управниот одбор на Агенцијата. Таа е во согласност со законската постапка и нивните надлежности. Владата не учествува директно во процесот на избор, но ја почитува автономијата на Управниот одбор при донесувањето на ваквите одлуки“, велат од Владата.
Според податоците на официјалната веб-страница, во Управниот одбор на Агенцијата се сите вработени во Министерството за образование или Министерството за финансии.
Алсат упати низа прашања и до Министерството за образование – дали ќе се преиспита одлуката по реакциите во јавноста и со какви аргументи министерката Весна Јаневска ќе го брани изборот на Богојески пред Европската комисија.
Министерство за образование:
„Директорот на Националната агенција се избира преку јавен конкурс објавен од страна на Управниот одбор. Во него се утврдуваат критериумите за селекција и, според информациите од одборот, изборот е направен по разгледувањето на двете апликации поднесени во рокот на конкурсот. Предност му е дадена на кандидатот со повисоко ниво на образование и поголемо работно искуство на високи раководни позиции. Доколку се појави некаков проблем во функционирањето на институцијата, ќе бидат преземени соодветни мерки.“
Министерката пред неколку дена изјави дека директорите треба да бидат натпартиски, но дека не може да се оценува работата на директор кој е избран пред само два дена. Таа додаде дека неговите дејствија ќе бидат следени отсега па натаму.
Европската комисија вчера за Алсат изјави дека е запознаена со загриженоста изразена во медиумите, ги има земено предвид реакциите и очекува да ја дискутира оваа тема со министерката за образование. Од Комисијата нагласија дека директорот на Агенцијата што се занимава со европските програми за образование треба да биде личност што ги почитува европските вредности.
Богојески е контроверзна личност која го претставува токму спротивното. Во неговите јавни ставови тој навредува и шири говор на омраза, главно кон Албанците, но и кон жените, ЛГБТ заедницата и лицата со ХИВ.
Против неговиот избор реагираа студентски организации, организации за заштита од дискриминација, но и опозициски политички партии. Албанските претставници во Владата јавно не побараа негова смена, иако изјавија дека ги споделуваат загриженостите со јавноста. Не реагираше ниту албанската академска заедница.
Додека јавноста продолжува да реагира, Богојески, избран минатата недела, но сè уште формално ненастапен на функцијата во присуство на претставници од Европската Унија, продолжува со активности како директор, испраќајќи соопштенија со печат и архивски број и посетувајќи училишта.
Фатлуме Дервиши
