Ова се досиејата кои во моментов ги има обезбедено обвинителството за скандалот на Клиниката за онкологија. Од обвинителството велат дека се во фаза на прибирање на докази и од соседните земји бидејќи постои сомневање дека пациенти од Косово и други држави се лекувани со терапии добиени од Скопје. Тим обвинители на Јавното обвинителство во текот на неделата биле во Косовското обвинителство и одржале состанок во насока на обезбедување на докази поврзани со истрагата. Паралелно со тоа се испрашуваат пациенти и нивни роднини, медицински персонал и други лица кои можат да имаат информации за случајот.
„Во овој дел од постапката не можеме да објавиме кои докази се прибрани, но ја нагласуваме сериозноста и итноста во која ова обвинителство ги спроведува доказите. Во текот на неделата наши обвинители се сретнаа со обвинители од Косово со цел постапката да не се одолговлекува и да се преземат сите активности кои се неопходни во делот на истрагата за овој случај“, велат од ЈО.
Косовските власти, преку контакт-центрите во Европската мрежа за правда, побараа конкретни податоци потребни за проверка на наводите врз основа на кои е започната истрага. Воедно, косовските обвинители изразиле подготвеност за соработка и обезбедување на потребните податоци. Во наредниот период, во зависност од потребите на истрагата, слична средба ќе се организира и во Обвинителството на Република Албанија. Во меѓувреме и Министерството за здравство ги достави и своите досиеја до обвинителството во Скопје.
„Министерството за здравство до ОЈО го достави извештајот од Државниот здравствен и санитарен инспекторат кој се однесува на работата на Клиниката за онкологија“, велат од Министерството за здравство.
Исто така, по наредба на јавен обвинител, во тек е финансиска истрага и детална ревизија на економско-финансиското функционирање на Клиниката, која ја врши тим од експерти, ревизори на Државниот завод за ревизија и претставници на Фондот за здравствено осигурување.
Аднан Ќаили
