Изгореа пет проценти од територијата на Македонија

На територијата на Македонија активни се 12 пожари, соопштуваат од Центарот за управување со кризи.

Од вкупно 49 во последните 24 часа, 7 се ставени под контрола, додека 30 се целосно изгаснати. Најтешка е состојбата во општина Македонски Брод каде во село Јасен-Белица гори борова шума, исто како и во општина Кочани и општина Македонска Каменица. Активни пожари има и во општина Кичево, Маврово, Новаци, Битола, Пласница и Пробиштип.

Во гаснењето на пожарите ќе се вклучи и Армијата, бидејќи по објавувањето на кризната состојба од страна на Владата, претседателката одлучи да ја ангажира армијата.

„Начинот и интензитетот како припадниците на Армијата ќе помагаат во гаснењето на пожарите ќе ги утврди Генералштабот на Армијата согласно барањата на Центарот за управување со кризи и состојбата на теренот“, наведоа од Кабинетот на претседателката Давкова.

Од опозициската партија СДСМ ја обвинува власта дека не успеале да ја менаџираат состојбата со пожарите и дека изгореле пет проценти од териротијата на Македонија

Според македонската опозиција, одговорен премиер и министер во ваква ситуација секојдневно треба да се во кризниот штаб.

Линда Ебиби