Јапонски научници создадоа пластика што се раствора во вода
Јапонски научници развија пластика која се распаѓа во морска вода за само неколку часа, што би можело да биде решение за загадувањето на океаните, кое го загрозува морскиот живот.
Експертите долго време експериментираа со биоразградлива пластика, а сега научниците од центарот RIKEN и Универзитетот во Токио развија нов материјал кој многу побрзо се распаѓа и не остава никаква трага.
Во лабораторија во градот Ваку во близина на Токио тимот покажа како парче пластика исчезна во базен со солена вода откако стоеше околу еден час.
Учесниците не наведоа детален план за комерцијализација, но лидерот на тимот, Такузо Аида, вели дека истражувањето привлекло значителен интерес, вклучително и од компании за пакување.
Научниците ширум светот се тркаат да развијат иновативни решенија за огромниот проблем со загадувањето со пластика. Загадувањето од пластика се очекува тројно да се зголеми до 2040 година, предвидува Програмата на ОН за животна средина, што значи дека дополнителни 23 до 37 милиони тони пластика ќе завршуваат во светските океани секоја година.
„Децата не можат да ја изберат планетата на која ќе живеат. Наша должност како научници е да се погрижиме да им ја оставиме најдобрата можна средина“, рече Аида.
