Ковачевски: Подобар договор и нова преговарачка рамка нема да има
Премиерот Димитар Ковачевски е оптимист дека уставните измени ќе поминат. Во интервју за агенцијата МИА, Ковачевски изјави дека сите се свесни дека оваа шанса не треба да се изгуби и дека подобар договор со Бугарија никогаш нема да се постигне.
„Дали ќе има одлука за уставните измени и со ова продолжување на европскиот пат, зависи само од нас. Одговорноста е на политичките актери, партиите и пратениците. Одлуката зависи од сите нас. Ова гласање е глас за Европа. Лично верувам дека Северна Македонија и пратениците нема да ја пропуштат оваа шанса. Едно треба да биде јасно на сите во државата, а тоа е дека не може да има подобар договор, не може да има нов договор и не може да има нова преговарачка рамка“, вели Ковачевски.
Но, опозицијата размислува поинаку. Според ВМРО-ДПМНЕ, нема да има уставни измени диктирани од Бугарија. Исмејувајќи се со појавувањето на министерот за надворешни работи, Бујар Османи пред таблата на која ја објаснуваше преговарачката рамка, опозицијата побара Османи да покаже во кое поглавје се предвидува распродажба на државните интереси.
Партијата на Христијан Мицкоски бара Османи да одговори во кое поглавје се предвидува дека претприемачкиот дух на Дрин Ахмети ќе ја земе Соравија без денар, хотелот на Артан Груби во Попова шапка, продавницата во Скопје и автомобилот Ауди, криминалните дела на Рамиз Мерко, тендерот за Арберија Дизајн, вработувањата на членови на семејства во државни институции, пожарот на тетовската модуларна болница, пожарот во автобусот на Беса транс итн.
Адриан Керими
