Ковачевски: Треба да има зголемување на платите во образованието, но живееме во најкризната година по Втората светска војна
Вработените во образованието заслужуваат поголеми плати, но живееме во најкризните години по Втората светска војна, рече во своето гостување во емисијата “360 Степени“ на Алсат премиерот Димитар Ковачевски. Говорејќи за барањето на СОНК тој рече:
„Сметам дека треба да има зголемување на платите во образованието, меѓутоа мора да бидеме свесни дека ова е најкризната година после Втората светска војна. Мора да се грижиме државата да може да ги финансира сите свои обврски, што и го прави…Она што веќе го разговараме со СОНК е да имаме рамка, односно методологија којашто ќе овозможи без политички влијанија во иднина да расне платата на работниците во образованието. Се прават калкулации и во министерството за образование и финансии, да се види кои се можностите што буџетото може да ги издржи во оваа кризна година“, рече Ковачевски.
