Летово ќе проработат 11 охридски плажи
По речиси три години неработење, единаесет охридски плажи, помеѓу и кои и најатрактивните, ова лето ќе проработат. Претходно објектите на плажите беа затворени поради истечени договори за концесија. Плажите сега ќе се издаваат во период од три години по пат на јавно надавање. За најатрактивните плажи почетната цена ќе биде 11000 евра. Се очекува да почнат со работа до 20-ти јуни.
„Ќе има локации по Охридското крајбрежје каде ќе може да се поставува урбана опрема. Станува збор за шанкови од природни материјали, дрво од 8 до 10 метри квадрати и маси и столици од 150 до 400 квадрати во зависност од големината на плажата“, рече Кирил Пецаков- градоначалник на Охрид.
Локалните власти велат дека неможат повеќе да го чекаат донесувањето на планот за управување со Охридското крајбрежје, кој треба да покаже, на кои места би можело да има уредени плажи.
„Таа задача беше на државата, односно на Агенцијата за просторно планирање заедно со Министерството за транспорт и врски. Ако чекам да има уште пет години да има неуредени плажи, тогаш сум неодговорен градоначалник на Охрид. Јас повеќе како градоначалник не можам да дозволам, да нема уредување на плажите“, додава Пецаков.
Во меѓувреме поранешни концесионери ја тужат општината, за претрпените штети од неработењето на плажите.Висината на побарувањата се неколку стотина илјади евра.
„Плажите беа искористени само како шминка да се прикаже дека нешто се работи во врска со зачувувањето на статусот на УНЕСКО’, вели Игор Кичеец-адвокат.
Инаку некогаш најатрактивните охридски плажи се претворени во јавни тоалети. Објектите се распаѓаат, а металните контрукции од платформите кои беа поставени во езерото, сега се расфрлани наоколу.
Мики Трајковски
