Лица од Пакистан и Авганистан криумчареле мигранти и изнудувале пари, определен 30 дневен притвор
Надлежен јавен обвинител од Основното јавно обвинителство за гонење на организиран криминал и корупција донесе наредба за спроведување истрага против две полнолетни лица од Пакистан и двајца малолетници од Авганистан. Осомничените се изведени пред судија на претходна постапка кој го прифати предлогот на Обвинителството и на сите осомничени со решение им определи притвор во траење од 30 дена.
Како што соопшти Јавното обвинителство, осомничените се товарат дека сториле кривично дело Организирање на група и поттикнување на извршување на делата трговија со луѓе, трговија со малолетно лице и криумчарење на мигранти од член 418-в став 2 и кривично дело Криумчарење на мигранти од член 418-б став 4 в.в. став 2 и 3 од Кривичниот законик.
Имено, во периодот од август до ноември оваа година две непознати лица од Пакистан со цел извршување на кривичното дело Криумчарење на мигранти создале организирана група на која припадници станале и осомничените. За непречено дејствување на групата тие создале импровизирани кампови во близина на границата со Србија каде ги прифаќале и сместувале мигрантите кои илегално влегувале од територијата на Грција, а од таму илегално ги пренесувале во Србија и земјите на ЕУ. Во камповите мигрантите присилно биле задржувани, им биле одземани мобилните телефони и личните документи со што им оневозможувале каков било контакт надвор од кампот. Искористувајќи ја нивната немоќ, осомничените физички ги малтретирале жртвите, ги фотографирале и фотографиите ги испраќале на нивните семејства од кои барале парични средства за да ги пуштат жртвите да ја продолжат рутата, со употреба на сила и закана изнудувале парични средства и од жртвите кон кои се однесувале на крајно суров и понижувачки начин, а со некои имале и полови односи.
