Локалните производи скапуваат во магацините, пазарите полни со увезени производи
Ние сме меѓу најплодните земји на Балканот за одгледување на некои овошја и зеленчуци, a нашите граѓани јадат странски производи. Поради ова, локалните производители се во тешка ситуација, и се жалат дека нивните производи скапуваат во магацините, додека зелените пазари се полни со производи од други земји. Националната федерација на фармери, итно ја повикува државата да преземе мерки за домашните производи да се стават на прво место и да има стабилна откупна цена од домашните производители.
Од ова здружение на земјоделци бараат со закон да се унифицира законската рамка за сите локални производи, по примерот на предлогот на законот за вино, а за тутунот да има однапред договор меѓу производителите и трговците за произведената количина загарантирана по прифатлива цена.
„Овој предложен нов закон за вина е на страната на лозарите и решава уште еден проблем, а тоа е откупната цена. Значи, со новиот закон за вино, за прв пат ќе се утврди производната цена на винското грозје по килограм, најдоцна до 15 јули во тековната година, за најмалку две од најчестите сорти. Пресметката на трошоците за производство на еден килограм грозје за вино на дадена површина и со соодветен квалитет, според одредена методологија, е предвидено да се врши од страна на повисока образовна или научна установа од областа на земјоделството“, велат од Министерството за земјоделство.
Според Министерството за земјоделство, годинава извозот на локално овошје и зеленчук е зголемен за 30 отсто во однос на претходната година, што значи дека локалните земјоделци избираат да ги понудат своите производи во странство –без да бидат ограничени за количината на продажба и за балансирање на потребите на домашниот пазар.
Аднан Ќаили
