Пред помалку од два месеца од главниот град на Шпанија доаѓаа нималку оптимистички бројки кога станува збор за епидемиолошката состојба. На крајот на септември, статистичките податоци покажаа 813 случаи на инфекција на 100.000 жители, додека другите шпански провинции забележаа помалку од 500. Ситуацијата се очекуваше да се влоши, но имаше пресврт.
Весникот „Ел Мундо“ целата ситуација ја нарекува „мадридско чудо“.
Додека поголемиот дел од Европа е заклучен, баровите и рестораните во шпанската престолнина се преполни до полноќ. Како и да е, бројот на пациенти со корона вирус се намалува. Во моментов има 328 случаи на 100.000 жители.
Што се случи во Мадрид?
„Тоа е прашање од милион долари“, изјави епидемиологот Хозе Хонај Оједа за „Ел Мундо“.
Тој смета дека станува збор за тестови за антиген што мадридските власти ги купиле пред два месеца, во износ од пет милиони евра, што помогнало да се зголеми тестирањето. Сепак, тој предупредува дека ова може да биде избрзан заклучок.
„Тоа беше правилна одлука. Тоа го олесни дијагностицирањето на побрз и поевтин начин. Така можете порано да ги изолирате заразените луѓе“, објаснува Охеда.
Мадрид, исто така, се придржува кон политиката на индивидуално затворање на регионите, односно ако се регистрираат голем број случаи во еден од нив, полицискиот час стапува на сила во 22 часот. Се чини дека и тоа функционира. Десет од 32 претходно затворени области се веќе отворени, бидејќи бројот на заразени е преполовен.
Исто така, локалните медиуми ја посочуваат „индивидуалната одговорност“ како една од причините за „мадридското чудо“. Шокот и трауматското искуство со вирусот пролетта оваа година, задржа многу Шпанци во своите домови.
Сепак, има и такви кои се скептични кога станува збор за овие оптимистички бројки – каталонските здравствени власти тврдат дека има застој во информациите и оти се сомневаат во веродостојноста на податоците, пред сѐ поради дискутабилната релевантност на тестовите за антиген.
Сепак, дури и ако бројот на заразени не кажува доволно, тогаш бројките во болницата сигурно покажуваат напредок. Имено, наместо 2500 хоспитализирани пациенти на ден, како во септември, сега има само околу 200.
