Масивни блокови од Светилникот во Александрија извлечени од Медитеранот
Работниците во египетскиот пристанишен град Александрија открија 22 масивни камени блокови кои биле користени пред илјадници години за изградба на познатиот светилник во градот, едно од Чудата на античкиот свет.
Камените блокови биле подигнати од дното на пристаништето во Александрија, на југоисточниот брег на Средоземното Море, и сега ќе бидат проучувани и дигитално скенирани. Резултатите ќе бидат додадени на дигиталните записи за повеќе од 100 камења откриени под вода во текот на изминатата деценија, според соопштението од Фондацијата Дасо Системс, еден од спонзорите на проектот.
Истражувањето го води францускиот археолог и архитект Изабел Хери и ги обединува експертизите на историчари, археолози, архитекти и инженери за да се создаде виртуелен 3Д модел на античкиот светилник, кој веќе бил сериозно оштетен од земјотреси кога се срушил во 14 век.
Неодамна пронајдените камења вклучуваат парчиња од огромна врата што тежела „70 до 80 тони“, според соопштението. Работниците, исто така, откриле делови од масивен „пилон“ или церемонијална порта во египетски стил, што можеби бил споменик.
Античко чудо
Светилникот на Александрија – познат и како Фарос на Александрија, по мал остров на влезот од пристаништето каде што се наоѓал – бил изграден околу 280 година п.н.е. по наредба на египетскиот крал Птоломеј II Филаделф (кој бил роден во Македонија) главно за безбедно водење на бродовите што се приближувале до пристаништето.
Градот е основан и именуван по македонскиот крал Александар Велики, кој го зазел Египет од Персиската империја во 332 година п.н.е. Александрија потоа станала египетска престолнина под хеленистичката (грчка) династија на фараони од Птоломеј (првиот, познат како Птоломеј I Сотер, бил еден од најдоверливите генерали на Александар) и еден од најбогатите градови во античкиот свет.
Извор: Live Science
