Меџити најави иницијатива за спојување на ВЛЕН во една партија; Таравари: Никој не ме известил за спојувањето
Во текот на неделата ќе се конкретизира иницијативата за спојување на ВЛЕН во политички субјект. Нема колебање во принципиелните определби за кои е создадена коалицијата која преминува во единствен политички субјект. Според претседателот на Демократското движење, Изет Меџити, ВЛЕН во една партија ќе ги вклучи Демократското движење, Движењето Беса, Алтернатива и Движењето Ветвендосје (самоопределување). Според него, единствениот кој има дилеми околу ова е Арбен Таравари, додавајќи дека не можете да бидете ВЛЕН и да соработувате со ДУИ.
„ВЛЕН е антипод на ДУИ и нема логика за соработка со ДУИ. Според тоа, кога се соработува со ДУИ се губи смислата на промената и се губи смислата на она што го баравме за глас. Во минатото албанскиот гласач бараше обединување на албанската опозиција, сега сака субјектите да се спојат во ВЛЕН. Верувам дека во текот на една недела ќе има иницијатива“, рече претседателот на Демократското движење.
Таравари рече дека нема информации за оваа иницијатива, додавајќи дека петте пратеници што ги ужива ќе функционираат како независна група. Таравари рече дека не го прифаќа ултиматумот од ВЛЕН, но останува отворен за соработка.
„Алијанса за Албанците ќе остане како субјект кој повторно ќе се обиде да соработува доколку се спои во партија. Досега не сме добиле таква понуда. Ако дојде ќе ја разгледаме… Ќе им го дадеме името и нека продолжат како ВЛЕН. Ќе останеме 5 пратеници како АА и ќе продолжиме со нашата пратеничка група. Отворени сме за соработка со сите. Со ДУИ, не сум зборувал“, рече министерот за здравство, Арбен Таравари.
Коалицијата ВЛЕН е формирана пред парламентарните избори. Тогаш беше претставена како опција да се донесе ротација на власта во албанскиот политички табор. Се официјализираше кога Арбен Таравари влезе во коалицијата. Тоа се манифестираше како почеток на промени. За ваквата одлука на Таравари му се закануваа по живот, кога непознати лица пукаа со огнено оружје пред неговата куќа. Тој беше отстранет од субјектот и му беа одземени партиските печати. /Алсат.мк
