Меѓународниот фактор апелира, членовите на Советот на Агенцијата за аудио и аудиовизуелни медиумски услуги да бидат професионалци и независни
Меѓународниот фактор апелира, членовите на Советот на Агенцијата за аудио и аудиовизуелни медиумски услуги да бидат професионалци и независни
Меѓународниот фактор ја нагласува потребата членовите на Советот на Агенцијата за аудио и аудиовизуелни медиумски услуги да бидат професионални и независни. Нивните реакции доаѓаат по првиот филтер во Собранието на дел од кандидатите кои имаат или имале политичка активност поврзана со некоја од политичките партии. Од Делегацијата на ЕУ во Скопје за Алсат велат дека кандидатите треба да имаат компетенции и искуство за оваа позиција.
„ЕУ внимателно го следи процесот на избор на парламентарната Комисија за избори и именувања за новите членови на Советот на Агенцијата за аудио и аудиовизуелни медиумски услуги, тело на кое му се доверени значителни овластувања да го надгледува управувањето и работењето на агенцијата и да обезбеди заштита и развој на плурализмот на медиумските услуги во земјата. Ја нагласуваме важноста кандидатите да бидат избрани и предложени за именување во согласност со критериумите утврдени во Законот за ААВМУ и особено, тие да ги имаат потребните компетенции и искуство за нивните функции“ – Делегација на ЕУ.
Ја нагласуваме важноста кандидатите да бидат избрани и предложени за именување во согласност со утврдените критериуми и да ги имаат потребните компетенции и искуство.
Германската амбасада смета дека е вознемирувачко што самите претставници на медиумите се критички настроени кон кандидатите кои треба да бидат способни самостојно да носат одлуки.
„Кога медиумските работници изразуваат остри критики за процедурата за назначување во Советот на ААВМУ, тогаш ова треба да биде причина за загриженост. Затоа што за да ја исполни својата улога, не смее да има сомнеж дека Советот има соодветни професионални надлежности и може самостојно да одлучува. Одговорност на Собранието е да го обезбеди тоа. Политичките партии во земјава со право ја нагласуваат важноста на именувањата врз основа на надлежности. Таквата заложба е веродостојна кога е конзистентен водечки принцип во сите процедури за именување“, велат од Амбасада на Германија.
На седницата на Комисијата за избори и именувања комисискиот филтер го поминаа Виктор Павловски, Сашо Стефановски, Петар Ѓуровски, Афрона Верзиволи, Нафије Селмани, Цветанка Миновска и Гордана Мајнова.
Седумте кандидати се монтажери, сниматели, продуценти, економисти и новинари, но тие се избрани пред неколку други кандидати со посоодветни и посериозни биографии во медиумската област. Тие се избрани по предлог на ВМРО-ДПМНЕ, ВЛЕН, СДСМ и ЗНАМ и секој од нив доби ист број гласови. Фронтот ја напушти салата по обвинувањата за политизирање на оваа институција.
Најозборувани имиња беа Нафије Селмани, која беше советничка за Алтернатива во општина Чаир, кандидат за градоначалник на Скопје од Беса и кандидат за пратеник на последните парламентарни избори под логото на коалицијата ВЛЕН. Под знак прашалник е и изборот на Афрона Верзиволи, која од актуелната власт беше поставена, а потоа и разрешена за главен ревизор на ИПА фондовите поради немање сертификат за работа.
Антикорупциската комисија отвори предмет за оценување на начинот на избор на членовите на советот на агенцијата. За избраните имиња треба да се гласа и на пленарна седница со двотретинско мнозинство и Бадентер.
