Мексико и САД ќе играат во финалето на Голд Купот

Бранителот на титулата Мексико ќе се соочи со домаќинот САД во финалето на Голд Купот, првенството на Северна и Централна Америка.

Advertisements

Мексиканците го победија Хондурас со 1-0 во полуфиналето, додека Американците беа подобри од Гватемала со 2-1.

Бранителот на титулата стигна до финалето благодарение на голот на Раул Хименез. Напаѓачот на Фулам погоди во 50-та минута.

Американците се пласираа во финалето благодарение на Диего Луна. Фудбалерот на Реал Солт Лејк ги постигна двата гола, во четвртата и 15-та минута. Олгер Ескобар го постигна единствениот гол за Гватемала во 80-та минута.

Финалето ќе се игра рано наутро во понеделник по македонско време, во 1:00 часот по полноќ, во Хјустон.

Голд Купот се игра од 1991 година, а во досегашните 17 изданија, Мексико победи девет пати, САД седум, а Канада еднаш.