Мнозинството ги одобри измените на законот за заштита на потрошувачите

Собранието ги усвои измените на Законот за заштита на потрошувачите, со кои се очекува поголема транспарентност во формирањето на цените, подобрување на конкурентноста и нивно потенцијално намалување во маркетите. Измените на законот предвидуваат обврска за трговците, секојдневно да ги објавуваат и ажурираат цените на секој производ што го продаваат на нивните веб-страници.

Advertisements

Почитувањето на оваа законска норма ќе го надгледува Пазарниот инспекторат кој ќе има можност да изрекува парични казни. Ова, според пратеникот Бојан Стојановски, се прави за да можат граѓаните да изберат кој производ на кој пазар ќе го купат. Тој најави ревизија и за продавачите на бела техника и за аптеките.

Пратениците на СДСМ не учествуваа ниту на комисиите, ниту на пленарната седница, иако претходно ја критикуваа како мерка која не им носи ништо добро на граѓаните. Во Комисијата за економски прашања имаа можност да поднесат амандмани.

Овој предлог – закон е продолжение на мерките на Владата, бидејќи претходно ги замрзна бруто профитните маржи за маркетите и за 102 групи производи. Беше поставена маржа од 5% за осум основни производи, 10% за 55 групи производи и 15% за 39 групи производи. Трговците не ги поздравија овие мерки, велејќи дека тешко ќе преживеат. Но, претходно кога беше воведена мерката „Новогодишна кошничка“ и им беше дадена можност да изберат колку ќе ги намалат цените, ја злоупотребија оваа мерка и манипулираа со цените. Сличен закон за објавување цени беше донесен и во Хрватска минатата недела. Со законските измени се воведоа ценовни лимити и за најважните производи./Алсат.мк

Зекирија Хаџиу