МОН: Апсурдно е со референдум да се блокира дигитализацијата и осовременување на образованието
Правото да се иницира референдум е легитимно и уставно загарантирано, но не е оправдана причината поради која се користи ова право, сметаат од Министерството за образование и наука. Во нивната реакција меѓудругото се додава:
Апсурдно е на референдум да се блокира напредокот и дигитализацијата со која се осовременува образованието, соопшти Министерството за образование и наука, додавајќи дека промените мора да се случат и од новините кои се предизвик за сите не треба да се откажуваме.
– Законското решение кое се однесува на материјалите за учење е целосно во согласност со времето и ерата на ИТ-технологијата во која младите живеат и за најголем дел од нив примената на електронски уред за совладување одредена наставна материја или тема, пребарување и истражување податоци преку интернет не претставува проблем, туку вообичаена практика која со законот ќе стане достапна за сите, вклучително и за учениците од социјално ранливите семејства, наведува МОН.
Реакцијата следува по одлуката на граѓанската иницијатива „Учебници и настава мора да има“ да собира потписи за иницирање референдум за да се запре донесувањето на новиот закон за учебници со кој се воведува дигитализација.
