МОН ќе ја избрише ДУИ од учебникот за петто одделение
За неполни 24 часа подоцна, МОН се пишмани. Сега бара корекција на книгата на албански јазик за петто одделение во која авторот Вехби Кадриу, татко на функционер на ДУИ, ја вклучи и кратенката од оваа политичка партија. Од ресорот на Шаќири, од каде вчера за АЛСАТ преку соопштение со десетици јазични грешки, застанаа во одбрана на авторот Кадриу, денеска велат дека образовниот процес треба да биде надвор од дневната политика и вклучувањето на одредена политичка структура во училишните учебници треба да се избегнува.
„Имајќи го предвид фактот дека образованието, како и целокупниот воспитно-образовен процес, се политички неутрални и надвор од дневната партиска политика, за да се избегне вмешаност на одредена политичка партија или структура во учебниците, пропустите во текстот ќе се коригираат во учебниот по албански јазик за 5-то одделение. МОН го повикува авторот на истакнатиот учебник и Педагошката служба да постапат според Законот за учебници“; велат од МОН.
Професорот Џеладин Мурати повикува политиката да ги држи рацете надвор од училиштата. Тој рече дека информациите за политичка партија не се потребни за ученици од петто одделение.
„Грешката што се случи, не знам дали е разумна или неразумна, затоа што разумна е ако авторот има политички придобивки, е без причина затоа што авторот имал многу други случаи и конкретни примери наместо да каже ДУИ. Кога учениците ќе прашаат што е ДУИ, наставникот треба детално да им објасни што е ДУИ, која била и како дејствува, а со тоа се вмешува и политиката, и со ова ја политизираме книгата, ја политизираме лекцијата“, вели проф. Мурати.
Мурати алармира за нивото на грешки во книгите, вели дека ако се анализираат сите, може да останеме без книги. Тој додаде дека во овие случаи ниту рецензентите, ниту уредниците, ниту лекторите, ниту преведувачите не си ја вршат работата како што треба.
„Политиката нема место во училиштето и образованието треба да се деполитизира и департизира. Во овој случај, има толку многу грешки и толку многу недостатоци во учебниците што ако седнеме и ги анализираме, сите книги треба да се повлечат од употреба“ „Не треба да очекуваме книгата да има 30% грешки како што вели министерот. книгата мора да се подобри бидејќи со ова создаваме погрешно знаење, необјективно знаење, нереално знаење, кои имплицираат и создаваат лоша хармонија меѓу учениците“, додава Мурати.
Инаку, на студентите им се сервираат искривени и нереални факти преку книгата Општество и историја, книгата Географија и други.
Ардит Рамадани
