Во наредни три месеци во сите шест јавни здравствени установи во Скопје каде има можност да се направи мамографија нема слободен термин, покажува проверката на Мој Термин. На прашањето од МИА зошто нема термини од Министерството за здравство посочуваат дека се спроведува Националната скрининг програма, додека жените се принудени решението да го бараат во приватните клиники.
Со оваа скрининг програма треба да бидат опфатени жените од 45 до 69 години кои не направиле мамографија во последните две години, како и жените на возраст од 40 до 44 години кои имаат член во семејството со рак на дојка или друг дополнителен ризик фактор.
Претседателката на здружението на Здружението на приватни лекари, Лилија Чолакова забележува дека Скопје е голем регион и тешко се наоѓаат термини, додека на пример во Велес е полесно и по еден месец може да се најде термин.
„Жените во најголем процент заради нивното здравје и брзата дијагноза мора да одат на приватни специјалисти за да може тоа брзо да се придвижи и да се дојде до отстранување на тие туморозни формации што ги откриваме во нашите ординации“, истакнува таа.
