Патрола на косовската гранична полиција била нападната во селото Жупче, во општина Зубин Поток, на северот на Косово, кој е претежно населено со Срби. Ова за Радио Слободна Европа го потврди портпаролот на полицијата за тој регион, Бранислав Радовиќ. На местото на настанот излегле истражни и патролни единици.
Полицијата потврди дека на главниот пат во селото Жупче било пукано врз службено возило на граничната полиција, при што возилото било оштетено, а истражната единицата го обезбедува местото каде што се случил нападот.
Српската листа објави соопштение во кое го осудува инцидентот.
„Овој инцидент има за цел да ја дестабилизира ситуацијата, но е и обид да се претстават Србите како насилници, што не е точно“, се вели во соопштението на Српската листа.
Српска листа ги повика „сите граѓани да се воздржат и да не станат цел на провокации и да не дозволат ваквите инциденти да го загрозат толку потребниот мир во оваа област“.
„Кој и да го направил ова не му мисли добро на српскиот народ“, заклучуваат тие во соопштението.
