Нов случај на лажно пријавување етничка припадност при вработување
Етничкото балансирање како критериум при вработување во државната администрација и јавните институции врз основа на правична и соодветна застапеност и понатаму е нефункционално. И досега имаше случаи кога граѓани од други етнички заедници се вработувале на места предвидени за Албанци со едноставно изјаснување дека се чувствуваат за Албанци. За високата плата во Агенцијата за цивилно воздухопловство дури и извесен Сашо Новковски се изјаснил за Албанец. На 14 септември годинава станал советник-инспектор за летачко работење во воздушниот сообраќај.
„Врз основа на резултатите од сите фази на селекцијата Комисијата за избор изготви конечна листа на кандидати и ја достави до директорот на Агенцијата за цивилно воздухопловство Томислав Тунтев, кој ја потпиша. Незадоволните кандидати имаат рок од 8 дена да се жалат на оваа одлука до Агенцијата за администрација“, наведоа од Агенцијата за цивилно воздухопловство.
Алсат го контактираше директорот Тунтев, но не добивме одговор за соодветната застапеност во Агенцијата. Јахи Јахиу е еден од основачите на оперативниот систем за балансирање при вработувањето. Според него, овој механизам нема намера да го продлабочи јазот меѓу 80 отсто Македонци и 20 отсто Албанци и другите заедници во земјава. Јахиу рече дека законот не ѝ забранува на комисијата да врши интервјуа на албански јазик со кандидати кои се изјаснуваат како Албанци на јавните конкурси.
„Никој не може да ѝ го ускрати правото на комисијата која прави интервју со кандидатите за административен службеник дека при интервјуто можат да поставуваат прашања кои имаат албански или македонски карактер за до некаде да го проверат јазичното познавање на тој кандидат. Како што беше порано кога за време на интервјуто се бараше познавање на англискиот јазик без сертификат. Секогаш правевме кратко интервју со кандидатот и на англиски јазик. Комисијата може да го потврди тоа преку овој процес“, рече Јахи Јахиу, изготвувач на „Балансерот“.
Злоупотреба на балансерот се врши со години речиси во сите државни институции. Правната дупка доведе до ситуација ниту во изводите од матичната книга на родените, ниту во личните документи да нема графа за етничка припадност, па припадноста при овие вработувања се потврдува само преку изјава на нотар.
Аднан Ќаили
