Ковид-19 го засени сезонскиот грип, за кој, според лекарите, многу граѓани не бараат помош за симптоми слични на корона-вирусот. Големата температурна разлика меѓу ноќните и утринските температури носат многу случаи со некој сезонски грип бидејќи вакцините сè уште не се стигнати. Имунолозите велат дека и покрај вакцинацијата против ковид, ранливите категории треба да се вакцинираат и против сезонски грип. Комбинацијата од двете би била идеална за безбедна сезона.
Здравствените власти сепак, се чини не се фокусирани на дневен план за справувањето со сезонскиот грип. Фокусот е врз вакцинацијата против КОВИД, но веќе подолго време процентот на целосно имунизирани е околу 35%. Дневните извештаи покажуваат зголемен број на вакцинирани со трета доза, но многумина сè уште не примиле ниту една.
„Во текот на вчерашниот ден беа дадени 6.830 вакцини, од кои 638 први дози, 1.472 втори и 4.720 трети. Заклучно со 22 октомври, вакцинирани се над 801 илјади граѓани, од кои близу 770 илјади се ревакцинирани, а над 10 илјади примиле трета доза“, наведуваат од Министерството за здравство.
Од Министерството за здравство не добивме конкретни податоци за бројот на заболени во моментов од сезонски грип. Минатата година беа регистрирани само 539 случаи. Лани имаше за дури 92,5% помалку заболени со грип, отколку претходно. Минатата есен и зима против сезонски грип беа вакцинирани околу 40.000 лица. Од нив со бесплатните вакцини околу 29.000 лица, а со комерцијалните околу 10.000.
Аднан Ќаили
