Новиот, мутиран вид на коронавирус веќе е регистриран во осум европски земји, објави синоќа регионалниот директор на Светската здравствена организација (СЗО) за Европа, Ханс Клуге, без притоа да ги наведе државите со регистрирани случаи.
„Во осум европски земји, Светската здравствена организација досега ја идентификуваше новата варијанта на ковид-19, наречена VOC-202012/01“, напиша Клуге на Твитер.
8 countries in the @WHO_Europe region have now identified the new #COVID19 variant VOC-202012/01. It is vital to strengthen existing protective measures: distancing/masks/staying in core support bubbles. @WHO is continuing to monitor & will provide updates👉 #solidarity is key
— Hans Kluge (@hans_kluge) December 25, 2020
Според него, новиот вид на вирус се шири и кај помладата популација, за разлика од претходните варијанти.
Тој повика на претпазливост додека се спроведува истражувањето на новиот вид, како и да се зајакнат постојните заштитни мерки, како физичкото растојание и носењето маски.
Инаку, новиот вид за првпат е откриен во Велика Британија на 14 декември, а потоа беше евидентиран и кај поединци во Австралија, Исланд, Италија и Холандија, а агенциите пренесоа и за неколку случаи во Данска.
Прв случај на инфекција со новиот вид во Франција е потврден во петокот, објави тамошното Министерство за здравство.
Станува збор за Французин кој пристигнал од Лондон на 19 декември и бил тестиран за новата варијанта на коронавирусот. Министерството соопшти дека првиот случај е пријавен во градот Турс, дека пациентот е во самоизолација и се чувствува добро.
