Основното обвинителство во Приштина соопшти дека е покрената „интензивна истрага“ со цел да се расветли случајот со нападот на новинарот Ваљон Суља.
Косовската полиција во дневниот извештај наведува дека нападот се случил на 11 април после 22 часот. Се наведува дека по нападот на новинарот непознати лица се оддалечиле со автомобил со локални регистарски таблички.
Претходно, во средата, на 12 април, Здружението на косовските новинари го осуди физичкиот напад врз новинарот Ваљон Суља и побара итна истрага и апсење на напаѓачот.
Суља вечерта на 11 април добил лекарска помош во Универзитетскиот клинички центар на Косово поради повреди на главата, кои, според Здружението на косовските новинари, ги добил кога бил нападнат од три лица во Приштина.
Нападот, се додава, се случил откако Суља го напуштил телевизиското студио и се сомнева дека непознати напаѓачи го следеле до населбата Сунчани Брег во Приштина.
„Овој напад е целосно неприфатлив и сериозен обид за нарушување и поткопување на слободата на говорот и медиумите во Косово“, соопшти Здружението.
