Од 1 јануари струјата нема да поскапи за тарифните блокови еден и два
Од 1 јануари нема да има поскапување на струјата за првиот и вториот тарифен блок, односно за домаќинствата кои трошат помалку струја. Но, во рок од две недели ќе се изврши корекција на цените од која се очекува да има поскапување на третиот и четвртиот тарифен блок. Министерот за економија Крешник Бектеши рече дека граѓаните што штедат ќе имаат поевтини сметки од минатата зима, со бесплатната дневна стапка и субвенциите, додека оние што трошат многу, според него, треба да плаќаат по пазарна цена и да не користат јавни пари како поддршка од државата.
Од електродистрибутивната компанија ЕВН Хоум велат дека само 15 отсто од потрошувачите се вклучени во блок тарифите три и четири во последните два месеци. Од ЕВН велат дека овие бројки се променливи во зависност од потрошувачката на струја, особено домаќинствата кои се греат на струја.
„Во месец октомври 2023 година, 86% од потрошувачите или околу 700 илјади потрошувачи влегле во тарифниот блок 1 и 2. Во ноември 2023 година, тарифните блокови 1 и 2 опфатија 85% од потрошувачите, односно околу 690 илјади потрошувачи“, велат од ЕВН Хоум.
Според новата методологија на Регулаторната комисија за енергетика, се очекува намалување на трошоците за пренос на електрична енергија во дистрибутивната мрежа за првиот и вториот тарифен блок. Од Регулаторна, најавуваат дека до следниот петок од ЕВН ќе добијат конечен нацрт, кој потоа ќе го испитаат согласно околностите на другите трошоци и ќе биде објавен пред нова година.
Аднан Ќаили
