Охрид нема да штеди струја и ќе има дочек на Нова Година
Локалните власти во Охрид нема да ги почитуваат препораките на Владата и нема да штедат струја за претстојните новогодишни празници. Градот ќе биде украсен, бидејќи како што вели градоначалникот, Охрид е туристички град, кој живее од туризам. Владата уште на почетокот на октомври ги повика општините да штедат електрична енергија бидејќи нè чека тешка зима.
„Ова значи дека ова се коси со одлуката на Владата, општините да штедат на струја? Да, се коси. Охрид е туристички центар и нема да трпи. Значи нема да прифатите никаква одлука на Влада? Ќе повторам – Охрид е туристички центар и се надевам дека нивните одлуки што ги носат и што ги менуваат од денес за вечер, што не е поврзано со енергетската криза, ќе почнат тие да ги почитуваат. Охрид е туристички центар којшто ќе го посетат огромен број на туристи и секако дека нема да трпи“, рече градоначалникот Пецаков.
Општината планира да потроши нешто повеќе од 12.000 евра за новогодишни светилки, украси и за новогодишна забава. Во меѓувреме Охрид веќе се продава како дестинација за Нова година во земјите од опкружувањето. Сепак, некои хотели веќе затворија или ќе го сторат тоа набргу поради високите сметки за струја. Во поголемиот дел од хотелите нема да има организиран дочек.
„Најверојатно нема да има во поголемиот дел од објектите. Претпоставувам дека помалите хотели ќе останат да работат бидејќи и трошоците се помали во тие објекти..“, вели Ана Јанчева-менаџер на хотел.
Од општина Струга ни соопштија дека ќе се придржуваат до штедењето. Ќе се украси само строгиот центар на градот и главниот мост преку Дрим. Ќе се користат старите декорации, а дента пред Нова Година ќе има само концерт и програма за деца. Инаку, во Струга се гаснат уличните светилки и градот е во мрак.
Мики Трајковски
