ООН со резолуција за мир во Украина додека Русија спрема офанзива
Обединетите нации на едногодишнината од руската агресија усвојуваат Резолуција за мир во Украина. Според првиот човек на организацијата, Антонио Гутереш оваа војна го одвлекува вниманието од други светски кризи и ги поттикнува глобалните тензии.
„Во меѓувреме, ги слушнавме имплицитните закани за употреба на нуклеарно оружје. Таканаречената тактичка употреба на нуклеарно оружје е крајно неприфатлива. Крајно време е да се повлечеме од работ“, рече Гутереш.
„И она што стана повеќе од очигледно во овие последни 12 месеци е дека оваа војна не е само за самата Украина, туку и за многу фундаментална работа. Станува збор за принципот на територијален интегритет содржан во Повелбата на Обединетите нации“, рече Дмитро Кулеба – министер за надворешни работи на Украина.
Спротивно од ваквите пораки, рускиот претседател на празникот на одбранбените сили, најави нови инвестиции во воената инфраструктура. Првиот човек на британската одбрана пак, е песимист дека наскоро може да настапи мир во регионот.
„Со посебно внимание, како и порано, ќе работиме на зајанување на нуклеарните капацитети“, нагласи Путин.
„Неговата првична намера минатиот 24-ти февруари беше да окупира осум главни цели, сите големи градови за три недели, да го има Киев за три дена и сè да биде готово. Па, неговата тридневна офанзива се претвори во офанзива од 365 дена и сè уште не е остварена ниту една од неговите цели“, рече Бен Волос – министер за одбрана на Велика Британија.
Според западните разузнавачки информации, руската војска наголемо се подготвува за скорешна офанзива на источниот и јужниот фронт и за таа цел веќе подолго време трупа стотици илјади војници на границата. Во исто време, Украина бара НАТО и другите западни држави што побрзо да ѝ достават оружје, особено тенкови и авиони.
Лука Андреев
