Такахиро Шираиши, познат како „Твитер убиец“, е погубен во Јапонија откако беше прогласен за виновен за убиство на девет лица во 2017 година. Тој ги распарчуваше телата на своите жртви во својот стан во близина на Токио.
Неговата егзекуција беше првата егзекуција во Јапонија за речиси три години и се случи во услови на растечки повици за укинување на смртната казна, особено по ослободителната пресуда минатата година за најдолго осудениот на смртна казна во светот, Ивао Хакамада.
„Твитер убиецот“ беше уапсен во 2017 година откако делови од телата на неговите жртви беа пронајдени во неговиот стан. Во 2020 година, тој ги призна сите девет убиства пред суд во Токио, велејќи дека сè за што е обвинет е вистина.
Сепак, неговите адвокати тврдеа дека обвиненијата требало да бидат намалени бидејќи „неговите жртви јасно се согласиле тој да ги убие“. Случајот предизвика огромен јавен интерес, при што повеќе од 600 луѓе аплицираа за само 13 места во јавната галерија од која беше можно да се следи рочиштето.
Обвинителството тврди дека обвинетиот отворил Твитер профил во март 2017 година за да контактира со жени кои сакале да извршат самоубиство. Тие биле лесни цели за него. Осум од неговите девет жртви биле жени, а една имала само 15 години. Единствениот маж што го убил имал 20 години, а Шираиши го убил затоа што ја барал својата девојка, што довело до конфронтација со убиецот, објавија јапонските медиуми.
Тој ги намамил своите жртви велејќи им дека може да им помогне да умрат, а во некои случаи тврдел дека потоа ќе се самоубие.
„Сакам да им помогнам на луѓето кои страдаат. Пишете ми во секое време“, напишал тој на својот Твитер.
Убиствата излегоа на виделина кога полицијата барала млада жена која исчезнала и која подоцна се покажала како една од неговите жртви. Потоа полицајците пронашле распарчени делови од телата на неговите жртви во станот на Шираиши во јапонскиот град Зама.
