Политички реакции за средбата Мицкоски – Филипче
Средбата на премиерот Христијан Мицкоски со лидерот на македонската опозиција Венко Филипче предизвика реакции од политичките партии. Демократската унија за интеграција соопшти дека денешната средба е во насока на создавање моноетничка коалиција, која има за цел преобликување на политичкиот модел на државата од мултиетничка демократија во моноетничка демократија.
„Иако други точки ќе бидат презентирани во јавноста, дозволете ни да ви ја претставиме агендата на денешниот состанок – она што нема да го слушнете во јавноста: неказнивост, како да не се одговара. Каков судски систем им е потребен за да продолжат да се напаѓаат меѓусебно во јавноста, но суштински да се штитат едни со други – дури и кога станува збор за трагедии како таа во Кочани. Како да се отстранат Албанците од сите политички и економски одлуки, од сите нивоа на власт во државата, а потоа да се држат на периферијата на општествените случувања“, рекоа од ДУИ.
И од Алијансата за Албанците, крилото на Зијадин Села смета дека средбата Мицкоски-Филипче е за да се заштитат меѓусебно, македонските олигарси и зајакнување на моноетничката држава.
„За што ќе разговараат Мицкоски и Филипче се знае. Последниов заедно со сите негови пријатели ќе избега од секаква законска одговорност за своите дела, а двајцата заедно ќе осмислат нов систем кој ќе продолжи да ги удира Албанците, да ја деалбанизира државата, да ги прогонува Албанците и да го зајакнува моноетничкиот режим. Ги прашуваме од ВРЕДИ што друго треба да се случи за да се освестат“, велат од крилото на Села во АА.
Од ВРЕДИ потсетија дека ДУИ се разочарани од тоа дека Венко Филипче ги напуштил на сред пат.
„Наместо да се занимаваат со клевети и напади врз коалицијата ВРЕДИ, уште еднаш јавно ги повикуваме да престанат да шират лаги и манипулации, кои немаат друга цел освен да ги оправдаат своите планови за бојкот на локалните избори, мизерен обид да создадат политичка криза и да се спасат. Мора конечно да сфатат дека токму поради нивното криминално владеење, ВМРО-ДПМНЕ освои 58 пратеници на минатогодишните парламентарни избори. Нема јавни или тајни планови за отстранување на Албанците од никаде“, рекоа од ВРЕДИ.
Во меѓувреме, во реакцијата на Движењето Знам се наведува дека Венко Филипче и СДСМ не можат да бидат решение за проблемите.
Мелихате Рустеми
