Пратениците следната недела се враќаат на работа
Следната недела пратениците треба да ја започнат новата сесија по летните одмори. Според најавите, во вторник на 30 август ќе се одржи координативна средба на претседателот на Собранието, Талат Џафери со координаторите на пратеничките групи на која ќе се договори динамиката на работа за неделата и периодот што доаѓа.
Меѓу првите активности во Собранието најверојатно ќе биде продолжување на работата на собраниската Комисија за прашања на изборите и именувањата за изборот на уставните судии за да може што поскоро да се пополнат испразнетите места во Уставниот суд, како и точки од дневен ред на заостанати седници, вклучувајќи и гласање по одредени закони за што немаше кворум пред одморите.
Џафери тогаш нагласи дека доколку има потреба, нова седница ќе биде закажана и порано. Според информациите од Собранието, доколку Владата побара прогласување кризна состојба, Џафери може веднаш или до 1 септември да свика седница и одлуката да биде донесена.
