Приватните превозници утре се враќаат на скопските улици
Автобуските станици за јавен превоз во главниот град и денеска беа преполни со граѓани, исто како и последните 8 месеци.
Некои чекаа по 30 минути, а други час или час и половина, бидејќи автобусите на нивната линија сообраќаат многу ретко или се преполни со патници.
„Патувам со автобус 19 и 20. Понекогаш треба да чекаме со часови. Јас сум пензионер, нема проблем за мене, но што е со моите внуци и внуки кои често доцнат на училиште. Или треба да излезат час или два порано. Не можеме да плаќаме такси, не можеме да пешачиме“, реагираат граѓаните.
Од Град Скопје во писмен одговор рекоа дека приватните превозници треба да се вклучат во јавниот превоз до крајот на неделава, но во текот на денот Јавното претпријатие најави дека тие ќе се вратат на скопските улици од утре. Првиот човек на оваа компанија потпишал договорот со приватните превозници, со што се отвора пат за 105 автобуси по улиците.
Еви Шкопи
