Привремено се прекинати работите на автопатот Скопје-Куманово

Поради несреќата што се случи на 2 септември токму на ова место каде трагично ги загубија животите татко и неговиот малолетен син од Куманово, работите на автопатот Скопје – Куманово се привремено стопирани. Обвинителството поведе постапка против две лица поради сомнение за сторено тешко кривично дело против безбедноста на луѓето во сообраќајот.
На местото на трагедијата од 2 септември камионот и трагите од несреќата се уште стоеа.

Advertisements

Според обвинителството, Државниот инспекторат за транспорт спровел вонредни истраги за градежните работи на автопатот каде на 2 септември се случи несреќата. По извршениот увид е составен записник и е донесено решение со кое фирмата била принудена веднаш да ги прекине сите градежни работи додека не се спроведат дополнителни истраги.

„Основното јавно обвинителство Скопје веднаш по тешката сообраќајна несреќа поведе постапка против две лица поради сомнение за сторено кривично дело – Тешки кривични дела против безбедноста на луѓето и имотот во сообраќај. Проверките продолжуваат за целосно расчистување на кривичната одговорност за настанот и по краткотрајниот притвор од 48 часа, по предлог на јавен обвинител, на двете лица им се одредени мерки на претпазливост”, велат од Основно јавно обвинителство Скопје.

Обвинителството додава дека правното лице, пак, мора да постави и одржува привремена вертикална и хоризонтална сообраќајна сигнализација која ќе овозможи безбедно и непречено одвивање на сообраќајот на автопатот. Против осомничените обвинителството претходно спроведе тестирање на нивната психичка и физичка состојба, можно присуство на наркотици или алкохол и изврши технички преглед на возилото. Двете мртви тела се предадени на обдукција./Алсат.мк

Авни Тахири