Работната група за изборните реформи започна со работа
Со конституирање на работната група за реформи во изборното законодавство вчера во Скопје стартуваше процесот на усогласување на ставовите за измени со цел подобрување на изборната легислатива. Во фокусот на работната група ќе биде имплементација на препораките на ОБСЕ/ОДИХР, а потоа и изготвување на нов изборен законик.
Министерот за правда Кренар Лога кој учествуваше на првата средба на работната група, истакна дека изборниот модел не е приоритет на групата.
-Имаме консензус за оваа работна група да ги инкорпорираме сите овие препораки и забелешки од ОБСЕ/ОДИХР. Моделот нас не ни е приоритет, останува само да имаме нов пречистен текст на овој Изборен законик, а исто така да се внесат сите овие забелешки. Ова е првата задача на работната група, а втората е изготвување на нов Изборен законик, изјави Лога по средбата на работната група, посакувајќи му успешна работа на Александар Новаковски, експерт и поранешен член на ДИК, кој беше избран за претседател на работната група.
