Регионалниот пат Арачиново – Ченто, никако да се реконструира

Овој регионален пат кој се протега меѓу Арачиново и Ченто го поврзува Скопје со Куманово, што го прави еден од најфреквентните регионални патишта во државата, а воедно и најопасен.

Advertisements

Тесниот коловоз, полн со дупки, без тротоари и без осветлување, им го отежнува движењето граѓаните.
Возилата кои одат кон Скопје мора да возат на средината на патот за да се избегнат дупките и на овој начин може да предизвикаат сообраќајна незгода.

„До мостот е уредено, оттаму не. Не чинат патиштата. Еве и овде овие сокаци, еднаш ги измериле, не ги погледнаа веќе, треба и овде да се средат…“.

„Тоа е на општина Гази Баба, не доаѓа да ја среди, така останува, а до Куманово е добро.”

Од Јавното претпријатие „Државни патишта“ уветуваат дека санацијата на овој дел е планирана за 2023 година.

„Кога станува збор за регионалниот пат од Ченто до Арачиново, треба да нагласиме дека тој регионален пат продолжува до Липково и се поврзува со Куманово, а таму досега рехабилитиравме делови од патот. Во план за следната година го има овој дел, бидејќи е невозможно да се рехабилитираат сите патишта одеднаш…“, изјави Ејуп Рустеми, ЈП „Државни патишта“.

Градоначалникот на општина Арачиново, Ридван Ибрахими, рече дека овој пат е на територијата на општина Гази Баба и таму треба да се бара одговорноста, но изрази подготвеност за меѓуопштинска соработка.

„Морам да нагласам дека имав средба со градоначалникот на општина Газибаба и ја изразив својата загриженост, бидејќи тој пат, како што кажавте, го поврзува градот, ја поврзува општина Липково, но поврзува и 15 илјади жители. Често имаме инциденти, дури и со фатални последици“, рече Ридван Ибрахими, градоначалник на Арачиново.

Од општина Гази баба не добивме одговор дали ќе соработуваат за реконструкција на овој патен правец.

Ајнур Бафќари