Ретка егзопланета откриена на работ на Млечниот Пат
Научниците открија ретка егзопланета што орбитира околу ѕвезда со мала маса, која се наоѓа на околу 3.200 светлосни години од Земјата.
Според студија на литвански научници објавена во списанието Astronomy & Astrophysics, станува збор за џиновска гасна планета наречена AT2021uey b, која орбитира околу ладна џуџеста ѕвезда со големина М, објави ABC News.
За да ја лоцираат оваа екстрасоларна планета, научниците користеле техника позната како гравитациско микролеќање, метод базиран на теоријата за релативност на Алберт Ајнштајн.
Присуството на маса, имено, го закривува простор-времето, а овој ефект е екстремен околу многу масивни објекти како што се црни дупки и галаксии, но ѕвездите и планетите исто така можат да предизвикаат значителен степен на закривеност, според податоците од американската вселенска агенција НАСА.
Се проценува дека новооткриената планета е малку поголема од Јупитер, велат истражувачите, а нејзината необична големина во споредба со ѕвездата околу која орбитира доведе до нејзиното откривање, објави Универзитетот Вилнус во Литванија.
Истражувачите додадоа дека гравитациското микролеќање е редок феномен, со само три планети откриени на овој начин во историјата на набљудувањата. Астрономите ја користат оваа техника за да бараат привремени „пулсирања“ на светлината додека анализираат огромна количина на податоци.
„Овој вид работа бара многу експертиза, трпение, па дури и малку среќа“, рече литванскиот истражувач Мариус Масколиуна.
Научниците велат дека микролеќањето е ветувачка техника, бидејќи овозможува откривање на „неочекуваното, па дури и невидливото“.
Литванските истражувачи соработуваа со научници од Астрономската опсерваторија на Универзитетот во Варшава за да анализираат податоци добиени од телескопите Гаја на Европската вселенска агенција и опсерваторијата на Универзитетот во Вилнус.
„Додека се собираа податоците, сфативме дека многу видови планетарни системи се сосема различни од нашиот сончев систем“, рече научничката Едита Стонкуте.
Првата егзопланета што орбитира околу ѕвезда е откриена во 1995 година, а оттогаш се потврдени над 6.000 вакви екстрасоларни планети.
