Роднините на заложниците упаднаа во израелскиот парламент
Роднините на заложниците упаднаа во израелскиот парламент
Група роднини на Израелците кои палестинските вооружени напаѓачи ги држат како заложници во Газа, упаднаа на состанокот на парламентарната комисија во Ерусалим на 22 јануари, барајќи од пратениците да направат повеќе за да се обидат да ги ослободат своите најблиски.
Упадот на околу 20 луѓе во парламентот е показател за растечкото несогласување во Израел, во четвртиот месец од војната во Газа против Хамас.
Една жена држеше слики од тројца членови на семејството кои беа меѓу 253-те луѓе киднапирани од Хамас за време на упадот во Израел на 7 октомври 2023 година, што ги предизвика најтешките борби во последните децении.
Околу 130 останаа во заробеништво откако другите беа вратени дома во ноември.
„Би сакала барем еден да се врати жив, еден од тројца!“ извикуваше и плачеше една жена меѓу демонстрантите, откако влезе во дискусијата во Комитетот за финансии на Кнесетот.
Другите демонстранти држеа знаци на кои пишуваше: „Нема да седите овде додека тие умираат таму“. „Ослободете ги сега, сега, сега!“ скандираа тие.
Напорите на САД, Катар и Египет да посредуваат за уште едно ослободување изгледа далеку од помирување на настојувањето на Израел да го уништи Хамас и барањата на Хамас Израел да се повлече и од неговите затвори да ги ослободи сите илјадници Палестинци – вклучително и високите милитанти.
Израел тврди дека 27 заложници загинале во заробеништво во Газа. Роднините стравуваат дека заморот од војната со Хамас може да го омекне фокусот кон заложниците. Демонстрациите кои првично промовираа национално единство станаа поагресивни.
Семејствата и поддржувачите, исто така, почнаа да кампуваат пред домот на премиерот Бенјамин Нетанјаху покрај брегот, како и пред зградата на Кнесетот.
„Нема да го оставиме додека не се вратат заложниците“, рече Ели Стеви, чиј син Ајдан е задржан во Газа.
Редовните митинзи за време на викендите со барање за ослободување на заложниците беа засилени во последниве недели. На протестите исто така се бараше избори што би можеле да ја урнат тврдодесната влада.
Антивладините протести што ја потресоа нацијата во 2023 година завршија по нападот на Хамас на 7 октомври. Политичките поделби беа ставени настрана додека Израелците се собраа зад армијата и семејствата на убиените или земени како заложници.
Но, со оглед на тоа што разорната војна во Газа веќе е во четвртиот месец, а анкетите покажуваат дека поддршката за Нетанјаху се намалува, повиците за промена на раководството стануваат се погласни./РСЕ/
