Русија и САД побараа итни консултации во Советот за безбедност на ОН за ситуацијата во Сирија. Москва очекува тие да се одржат денеска, соопшти руската мисија во ОН.
„Москва и Вашингтон побараа итни затворени консултации од страна на Советот за безбедност на ОН во врска со насилството врз цивилите во западна Сирија“, напиша првиот заменик постојан претставник на Русија во ОН, Дмитриј Полјански, на својот канал Телеграм.
Постојаната мисија очекува данската мисија во Советот за безбедност на ОН да закаже консултации за денеска во 15 часот.
Истовремено, либанскиот весник „Нахар“ тврди дека бројот на цивилни жртви во судирите меѓу безбедносните сили на новите сириски власти и вооружените поддржувачи на поранешниот претседател Башар Асад на западот на земјата се зголемил од 830 на 973 за еден ден. Според постоечките информации, меѓу загинатите има жени и деца, но нивниот број не се наведува.
Министерството за информации во сириската преодна влада ги нарече неточни тврдењата за насилство врз цивили во западните провинции на земјата.
За потсетување, во четвртокот жестоки судири избија во Џабле, неколку области на Латакија и во планинските области на провинциите Латакија и Тартус, меѓу сириските безбедносни сили и вооружените групи кои се противат на новата влада.
Претходниот ден во двете провинции пристигнаа дополнителни единици на армијата и Министерството за внатрешни работи, а беа распоредени и борбени хеликоптери. Локалните власти воведоа полициски час. Сирискиот привремен претседател Ахмед ал Шара ги повика вооружените групи да го положат оружјето.
