Изборен партиски конгрес на СДСМ, Сања Лукаревска, нова заменик-претседателка
Актуелната директорка на Управата за јавни приходи, Сања Лукаревска е избрана за нова заменик-претседателка на СДСМ. Од вкупно 703 присутни делегати, ЗА гласаа 682, а само двајца против. Таа доаѓа на местото на Радмила Шекеринска, која два мандати беше на оваа позиција. Лукаревска ја презема функцијата како член на досегашниот состав на Извршниот одбор на СДСМ. Лидерот Зоран Заев му се заблагодари на досегашното раководство на партијата и ги наброја успесите изминативе години.
„Ние од доаѓањето на власт се боревме на два фронта истовремено, на надворешен план, мораше да се решаваат наследени децениски проблеми, прашања за кои никој не собрал храброст да ги решава речиси 30 години. И на внатрешен план, од првиот ден кога почнавме да ја водиме Владата, ние сме соочени со целосно деструктивно водство на опозицијата, со истата режимска матрица која прави сè за да ги спречува реформите“, изјави Заев.
Покрај изборот на нов заменик-претседател, денеска на 26-от изборен Конгрес се избраа и 120 членови на Централниот и девет членови на Надзорниот одбор. Меѓу новите имиња во Централниот одбор се Нина Фити, Јована Тренчевска, Димитар Ковачевски, Андријана Будимир и директорката на Инфективната клиника во Скопје, Милена Стевановиќ.
Андреа Чобанова
