Сè уште не завршиле преговорите во ВЛЕН за настапот на локалните избори
Сè уште не завршиле преговорите меѓу пратениците на ВЛЕН во однос на тоа како оваа коалиција ќе настапи на локалните избори. Пратеникот Беким Ќоку вели дека единствениот предлог кој се дискутира е оној на Алијансата за Албанците да настапат со заеднички листи за општински советници, иако претходно претседателот на оваа партија, Арбен Таравари, спомена дека ќе настапат одделно. Предлогот на АА, како што соопшти Ќоку, има поддршка и од претседателството на партијата.
„Останува дискусијата која општина би им припаднала врз основа на истражувања, проширувања, членство, анкети, која општина, односно кандидатот за градоначалник би припаднал на партија која ќе раководи и секако има многу добра комбинација ако кандидатот е од една партија, носителот на листата да биде од друга, штабот да го води друга партија“, рече Ќоку.
Пратеникот на оваа партија Ријад Шаќири вели дека се чекаат предлозите на другите партии за на крај сите предлози да се испреплетат и да се постигне договор..
„Се разговараше и за верзијата да се оди одделно за листи на советници, но има друга верзија која е со заедничка листа. Видете, ние размислувавме за нацрт верзија, разговаравме со колегите, чекаме и од нив да дојдат предлози и ќе ги преплеткаме предлозите и ќе видиме кој е најмногу вклучен во структурите и ќе имаме подобар избор“, рече Ријад Шаќири – ВЛЕН.
И Ќоку и Шаќири негираат дека на двете досега одржани средби разговарале за процентот на општини, додека кандидатите ќе бидат поделени во зависност од тоа која партија има најголем број членови. Што се однесува до општините на кои им се заканува опасност, и двете потврдуваат дека се подготвени да разговараат со Европскиот фронт за да излезат со заеднички кандидат. Од она што досега е познато во јавноста, кандидат на Беса ќе биде во Тетово и Желино, кандидат на АА во Гостивар, а на ДД во Чаир. Движењето Самоопределување, иако не е регистрирано како субјект во Македонија, но има пратеник, на локалните избори нема да се натпреварува со кандидати за градоначалници или општински советници.
Зекирија Хаџиу
