Шолц пред средбата со Макрон: Европа мора да остане обединета
Германскиот канцелар Олаф Шолц ја повика Европа да се обедини за поддршка на Украина, неколку часа пред пристигнувањето во Париз на клучниот самит на европските лидери на кој ќе се разговара за заеднички став за мировните преговори.
На настан во централниот германски град Касел, одржан во рамки на предизборната кампања, Шолц рече дека е важно да се направи сè што е можно за да се осигури дека Европа ќе остане силна и обединета.
„Ова ни треба за Украина, ни треба ова за нашата сопствена безбедност“, рече Шолц, чии социјалдемократи заостануваат во германските анкети пред националните избори во недела.
Шолц подоцна денеска треба да отпатува за Париз каде што ќе присуствува на состанокот чиј домаќин ќе биде францускиот претседател Емануел Макрон.
Целта на состанокот е да се договори заедничка стратегија за тоа на кој начин европските лидери да се однесуваат кон Трамп, да се разгледа што може да му се понуди и да се види кои се европските ограничувања кога станува збор за инвазијата на Москва врз Украина.
