Премиерот Христијан Мицкоски и неговиот грчки колега Кирјакос Мицотакис не потврдија можна билатерална средба на маргините на Самитот на НАТО во Вашингтон, но не ја исклучуваат можноста за такво нешто. Портпаролот на грчката Влада, Павлос Маринакис, рече дека грчкиот премиер планира да го подигне на високо ниво прашањето за почитување на договорот од Преспа. „Состанокот не е планиран, но не е исклучено во рамки на активностите, премиерот да има некои билатерални средби“, рече портпаролот на грчката влада.
Од Владата во Скопје велат дека грчката страна досега не побарала средба со македонската делегација во НАТО. „Подготвени сме да разговараме за сите прашања, вклучително и за имплементацијата на Договорот од Преспа, за кој веќе е познато дека се почитува од страна на македонската влада, но таквиот дијалог би бил добра можност да видиме кои прашања ги почитува и грчката страна во рамките на своите обврски од овој договор“, велат од Владата. Тие велат дека би било добро да се фокусираат на економската соработка, наместо на зајакнување на политичките позиции и националистичките емоции.
Во пресрет на тридневниот Самит во Вашингтон, беа потврдени и агендата, темите на дискусија, формалната вечера и учесниците. Поранешниот дипломат Васко Наумовски смета дека фактот што високи државни функционери се учесници на овој самит говори за стратешката определба на новата влада.
Поддршката за Украина и безбедносните предизвици ќе бидат клучни теми на самитот.
Самитот во Вашингтон официјално започнува утре, а главните активности се на 10-ти. Покрај заедничката тркалезна маса, шефовите на држави ќе присуствуваат на вечерата во Белата куќа, чиј домаќин е американскиот претседател Џо Бајден, а министрите за надворешни работи ќе присуствуваат на вечерата на државниот секретар Ентони Блинкен.
Самитот ја одбележува 75-годишнината од Северноатлантската алијанса./Алсат.мк
Фатлуме Дервиши
