Тешка зима за административците, 85% од нив земаат плата под просечната

Зимата што доаѓа тешко ќе ја издржат вработените кои имаат плата под просечната. Со овие цени на храна и струја над 80 проценти од вработените во администрацијата едвај ќе крпат крај со крај, вели претседателот на Синдикатот на државната управа и правосудството, УПОЗ, Трпе Деаноски.

Advertisements

Во неделното интервју за Радио Слободна Европа, Деаноски вели дека Владата нема слух за вработените кои се под државна капа. Две минимални плати од 18 илјади денари нема да може да ги покријат месечните трошоци, кои според синдикалната кошничка достигнаа речиси 40 илјади денари.

„Цените што се ставени во таа минимална кошничка се најниските цени на основни производи кои можат да се најдат во Македонија и тоа не во продавници, туку на пазари. Значи се гледаат најниските цени за хигиена, за исхрана, за превоз, за културно-забавен живот, што верувајте ми дека со оваа плата – никој го нема, за образование. Кога ќе се земат сите овие најниски цени моменталната синдикална кошничка не ја крпат две минимални плати. Во јавен сектор, минимум 85 отсто од вработените се под таа просечна плата. Кој може да издржи со овие цени на струја, со овие цени што допрва ќе нè чекаат до крајот на оваа година?“, изјави Трпе Деаноски-Претседател на УПОЗ.

Денаоски вели дека барањето за линеарно зголемување на платите во администрацијата за 2.800 денари не е исполнето од властите и покрај дадените рокови.

Синдикатот веќе подготвил тужба против државата која ќе биде доставена до Советот на Европа, преку меѓународната организација на труд. На почетоков на годинава синдикатите побараа зголемување на платите за секој вработен по 2.800 денари, согласно поскапувањата на цените и зголемениот минималец.

Владата им вети зголемување кое ќе биде вметнато во ребаланост, но тоа не се случи, оправдувајќи се дека прво треба да се донесе методологија за раст на платите и да се мери продуктивноста на работникот./Alsat.mk

Андреа Чобанова