Претседателот на САД, Доналд Трамп и неговиот кинески колега Си Џинпинг ќе присуствуваат на виртуелниот самит на лидерите Азија-Пацифик, на кој ќе се разговара за коронавирусот и глобалното економско закрепнување.
Лидерите од азиско пацифичкиот регион повикаа на поотворена и мултилатерална трговија за поддршка на економското закрепнување и предупредија против протекционистичката трговска политика.
Откако дојде на власт во 2017 година, Трамп воведе тарифи за кинески производи во вредност од милијарди долари, кои започнаа трговска војна меѓу двете најголеми светски економии.
На последниот самит на АПЕК во 2018 година, земјите-членки не успеаја да се договорат за заедничко соопштение за прв пат во историјата на блокот, бидејќи САД и Кина не се согласија за трговијата и инвестициите.
Во пресрет на состанокот во петокот, неколку лидери на АПЕК предупредуваа на протекционизам, додека светот се бори со економското влијание на новиот коронавирус.
