Уште шест месеци за исполнување на барањата на УНЕСКО
Македонските и албанските власти имаат последна шанса да ги решат проблемите за зачувување на регионот околу Охридското Езеро. Тие имаат рок до 1 февруари 2025 год, за Езерото да не се најде на црната листа на загрозени подрачја. Двете влади треба да достават нов извештај за состојбата со природното и културно наследство на Охридскиот регион.
„Мислам дека последниот рок кој Унеско го постави до 1 февруари 2025 година, за средување на дивоградбите околу езерото, ако не се испочитува ќе значи дека ние ќе имаме голема загуба за Охридското Езеро, народот и самата држава. Мислам дека државата со своите заложби и државните институции можат да го средат ова прашање, бидејки тоа не е само државен проблем, туку и меѓународен ,бидејки Охридското Езеро е под заштита на УНЕСКО“, рече Беким Зиба, биолог.
Граѓанските активисти од Охрид велат дека три проблеми се главни со кои регионот се соочува – неконтролираната урбанизација со повеќе од триста дивоизградени објекти, од Радожда до Свети Наум, отпадните води кои се влеваат директно во езерото, како и нефункционалниот колекторски систем, изграден пред 30 години. Статистичките податоци покажуваат дека на пример во Струга, во последните пет години е одобрена површина за изградба од 91.500м2.
„Веруваме дека ќе сфатат еден ден дека Охридското Езеро не претставува бара, туку е основен ресурс за опстанок не на македонскиот народ, туку на цел европски народ. И верувам конечно оваа Влада ќе започне со исполнување на сите оние препораки кои ги има дадено УНЕСКО“, рече Сашо Кироски, здружение „Енхелеус Лихнид“.
Проблемите се големи и од двете страни на границата, како што се оние поврзани со копнената и транспортна инфраструктура, алтернативната траса на Коридорот VIII, заштита на изворите Дрилон на албанска страна, но и големите развојни интервенции околу езерото. Мисија на УНЕСКО во април годинава беше во инспекција на регионот, за да види што од 12 забелешки дадени претходно се реализирани.
Мики Трајковски
