В недела посебен сообраќаен режим, ќе се трча Скопскиот маратон
В недела традиционално по 17-ти пат ќе се одржи „Виз Ер Скопски маратон“.
Стартот на маратонот, полумаратонот и штафетниот маратон – ЕУ за спорт ќе биде во 8 часот, а трката на 5 километри ќе започне во 8:10 часот, од платото пред Спортскиот центар „Борис Трајковски“, каде што ќе биде и целта на овогодишниот маратон.
Патеката по која учесниците ќе трчаат ќе биде иста, како и претходната година, а од организацијата известуваат дека дел од скопските улици во периодот од 7:30 до 14 часот ќе имаат привремен режим на сообраќај и промена на режимот на работа на линиите на Јавниот градски превоз.
Целосно затворени за сообраќај ќе бидат следниве улици: ул. „Димитрије Чуповски“, булевар „Илинденска“ од Влада до Зоолошка градина, ул. „Војвода Васил Чакаларов“, ул. „Митрополит Теодосиј Гологанов“, ул. „11 Октомври“, делот на бул. „Крушевска Република“ од семафорите кај Тутунски Комбинат до семафорите кај Полициската Станица Пролет, бул. „3 Македонска Бригада“ од семафорите кај Полициската Станица Пролет до раскрсницата со ул. „Фрањо Клуз“, десната коловозна лента од бул. „Јане Сандански“ од Тобако во правец накај Аеродром се до раскрсницата со бул. „Србија“.
Делумно затворени за сообраќај ќе бидат следниве улици и правци: десната коловозна лента од бул. „Климент Охридски“ до семафорите кај Влада, бул. „Илинденска“, од Зоолошка градина до „Љубљанска“, спротивната страна ќе биде слободна за движење, ул. „Љубљанска“ во правец од бул. „Илинденска“ до семафорите кај бул. „Партизански одреди“, ул. „Московска“ во правец од бул. „Партизански Одреди“ до Студентскиот дом Гоце Делчев.
