Влада: Не е донесена одлука која фирма ќе управува со паркингот на Клинички

Поскапо ќе чини паркирањето во катните гаражи на Универзитетската клиника „Мајка Тереза“. Од 30 денари за час граѓаните ќе плаќаат по 50 денари за час. На отворениот тендер учествуваше само една компанија од Албанија. Министерот за здравство Арбен Таравари вели дека оваа цена за граѓаните не е висока, бидејќи има земји каде што цените се повисоки. Според него, со катните гаражи се очекува двојно да се зголеми капацитетот за паркирање.

Advertisements

„Цените се 50 денари за еден час, во Рамстор е 60 денари… Видете, овде имаме случаи да ги оставаат колите и да одат во град. Мислам дека 50 денари е разумна цена за околината. Пред Нова Македонија е 40 денари за граѓаните, така што 50 денари не е многу висока цена. Мислам дека со оглед на тоа како се движат цените, цената не е лоша“, рече Арбен Таравари, министер за здравство.

Премиерот Христијан Мицкоски рече дека Владата не донела одлука за фирмата што се пријавила на тендерот. Доколку прецизно не ги исполнува критериумите, нема да биде избрана.

Тендерските процедури поминаа во Министерството за здравство, сега единствено што треба да се направи е Владата да даде зелено светло. Доколку фирмата „Ѓока констракшн“ победи на тендерот за паркинзи ќе стопанисува со паркингот во наредните години, и е предвидено да изгради две катни гаражи, да стопанисува со целиот паркинг на Клиничкиот центар, а за возврат државата да заработува еден процент од остварениот годишен приход. Според проценките на Министерството за здравство, инвестицијата ќе го чини концесионерот над десет милиони евра. Во моментов скопскиот Клинички центар располага со 800 паркинг места, додека двокатната гаража ќе обезбеди дополнителни 800 до 900 места./Алсат.мк

Линда Ебиби