Владата на Македонија додели национално признание за врвни достигнувања во фудбалот, кошарката и ракометот на 22 спортисти кои освоија титули во Европската лига на шампиони со своите домашни и меѓународни клубови. Покрај плакета, спортистите ќе добијат и доживотна пензија до еден и пол пати поголема од просечната плата во земјата. Добитници на кои премиерот им ги додели епитетите на херои и легенди се Горан Пандев, Дарко Панчев, Илија Најдоски, Перо Антиќ, Кирил Лазаровски и други. Сепак, меѓу одликуваните не се најде ниту еден спортист Албанец. Објаснувањето на премиерот е дека пензиите се даваат на спортисти кои настапувале во колективни спортови.
Мицкоски објасни дека етничкиот профил на пензионираните спортисти се разликува кога станува збор за индивидуални спортови.
На настанот, покрај првиот човек на извршната власт, присутен беше и министерот за спорт, Борче Ристовски, додека заменичката Сафије Садики Шаини, беше отсутна. Во кратка изјава за Алсат, Садики нагласи дека не можела да учествува на настанот откако била во болница, додека во врска со прашањето зошто меѓу одликуваните спортисти нема Албанци, таа изјави:
„На овој настан што е закажан за денес, ќе бидат наградени само оние ветерани од овие спортови, кошарка, ракомет и фудбал, кои постигнале меѓународен успех, а во иднина се планирани и ветерани од други спортови, каде што сигурно ќе има Албанци.“
Во врска со недостатокот на спортисти Албанци на списокот на одликувани спортисти, критики стигнаа и од албанската опозиција.
Суад Бајрами
