Властa и опозицијата се судрија околу Реформската агенда
Властa и опозицијата се судрија околу Реформската агенда
Уставните измени како услов за почеток на преговорите со Европската Унија беа главна тема на дискусијата во Националниот совет за евроинтеграции, на кој покрај пратениците, учествуваа и министри, професори и претставници на граѓанскиот сектор, за да се разговара за спроведувањето на Реформската агенда за периодот 2024–2027. Реформската агенда предвидува серија закони за реформи во дигитализацијата и судството. Според опозицијата, сето тоа е во застој поради билатералното барање на Бугарија за вметнување на Бугарите во Уставот.
„Забавувањето на европската интеграција, билатералните барања како што е бугарското за идентитет и историја ја попречија политичката волја за реформи, а спроведувањето на Агендата е заглавено во однос на усвојувањето на законите предвидени како услов за спроведување на финансискиот пакет“, рече Илир Демири, пратеник наЕвропскиот фронт.
„И залудно зборуваме за реформи и за агенда, нормално дека се многу важни, многу неопходни, ако првично не дадеме сигнал, не сме подготвени да ги спроведеме овие уставни измени. Замислете пред една година бевме многу поблиску до уставните измени отколку една година подоцна, по новата влада“, рече Халил Снопче, Алијанса за Албанците.
Министерот за европски прашања, Орхан Муртезани, кој првично го презентираше спроведувањето на мерките предвидени во Реформската агенда, негираше дека има застој во реформите.
„Не ве разбрав баш добро во делот каде што рековте дека политичката волја за спроведување на реформската агенда е попречена бидејќи ако сите високи европски претставници, вклучувајќи го претседателот Кошта, високата претставничка Каја Калас, кога ќе дојдат во Скопје, велат дека Македонија е прва, се движи со добро темпо кон имплементација, не знам како е попречена имплементацијата на реформската агенда бидејќи испаѓа дека или тие не ја кажуваат вистината или ние“, додаде Орхан Муртезани, министер за европски прашања.
Пратениците на ВМРО и СДСМ го критикуваа отсуството на министерот за правда Игор Филков на седницата, иако неговиот ресор е вклучен во активностите за реформските закони. Според нив, недоаѓањето на Филков покажува непочитување. Од Кабинетот на Филков за Алсат нагласија дека министерот не бил во можност да присуствува поради итни обврски./Алсат.мк
Суад Бајрами
