ВМРО-ДПМНЕ: Со Манифестот се испушта можноста за консензус
Откако во текот на денешниот ден владејачките партии објавија Манифест заради обединување околу европската иднина, преку кој повикуваат и на гласање за уставните измени, со реакција се јави опозициската ВМРО ДПМНЕ.
„Со овој чекор власта уште еднаш ја испушта можноста за консензус. Имено седнале Бујар Османи, Артан Груби и можеби Бојан Маричиќ напишале документ кој го насловиле манифест и откако самите го дефинирале го пуштаат во форма на соопштение преку сервисната служба на СДС до јавност со повик ВМРО-ДПМНЕ да прифати веќе напишан документ. Освен тоа што со овој чекор тие признаваат дека не мрднале ниту милиметар во насока на остварување на стратешките интереси на државата, тие покажуваат и отсуство на целосен капацитет за градење на консензус. ВМРО-ДПМНЕ откако официјално ќе го добие тој документ, ако воопшто има основа за разгледување, ќе го изанализира и ќе излезе со свој став“, рекоа од ВМРО-ДПМНЕ.
